محمد فؤاد نقيب
عدد الرسائل : 109 العمر : 33 نقاط : 5863 السٌّمعَة : 0 تاريخ التسجيل : 07/07/2009
| موضوع: الناس و العربيات و الصين الجمعة مايو 28, 2010 1:19 am | |
| بسم الله الرحمن الرحيمالناس و العربيات و الصين بعد ما عدى كذا سنه و الصين ماشيه بوتيره حاميه و مغرقه مصر كركبه, حبيت أنزل الشارع و أسأل الناس على رأيهم في عربياتهم و انقلهاكوا بكل حياديه و أمانه...
بالنسبه للصوره إلي في الإفتتاحيه, دي صورة للآسف مش حلوة أوي, صورتها و أنا في طريقي لأكتوبر و طبعا كنت ماشي بالعربيه فالصوره مطلعتش حلوة ز إزاز العربيه المطره ممطره عليه فمعلش بس كان لازم أصور العربيه و هي زيرو و بتتجر, يعني الواحد بيجيب عربيه زيرو علشان يريح دماغه من هم التصليح بس مش كل زيرو يتقال عليه زيرو... قررت أنزل الشارع و أسأل الناس ايه رأيكوا في العربيه و بقالها معاك قد ايه؟ و كان معاك قبل كده عربيه قبلها و لا دي أول بختك؟ ترشحها لحد ولا لاء؟ و دي كانت إجاباتهم.م.ع (شيري كيو كيو): أنا معايا العربيه دي بقالها سنتين و العربيه مش وحشه بس عيبها ان فوانيسها عتمت زي ما أنت شايف و صيانتها غاليه لإن ملهاش قطع غيار في السوق غير في الوكيل و أنا مكنتش مستني أجيب عربيه رخيصه و ألاقي قطع غيارها غاليه.
أنا مش ندمان على العربيه و شايف ان الصيني ليه مستقبل في مصر بس ياريت يهتموا شويه بقطع الغيار.
أنصح اي حد بيها. م.خ (إسبيرانزا A516 العربيه لسه مكملتش معايا أكتر من سنه و لغاية دلوقت ملقتش منها مشاكل زي ما بنسمع انها بتولع أو الفرامل وحشه, العربيه عجباني جدا و دي أول عربيه و لو جبت حجيب إسبيرانزا تاني.
الصيانه مواظب عليها في الوكيل و انصح اي حد بيها...س.ر. إسبيرانزا A113: إلي خلاني أجيب العربيه دي هو عمر أبني لما شفناها في المعرض شبط فيها فجبتها علشان خاطره, أنا مليش في السواقه قوي و إلي علمني جوزي و دي أول عربيه ليا فمعرفش أوي في العربيات بس مش لاقيه عيوب فيها لحد دلوقت.
مقدرش أنصح حد بحاجه لإن زي ما قلتلك مليش خبره في العربيات و دي أول عربيه ليا و كل مشاويري قريبه من البيت.أ.ع (بريليانس جالينا): العربيه شكلها حلو و أوبشنز حلوة بس ب 150,000 جنيه كان قدامي إختيارات أحسن و مش عارف ايه إلي خلاني جبتها بس هي كعربيه أنا شايف انها أحسن من الإسبيرانزا و طبعا أغلى.
إلي مضايقني فيها ان ملهاش قطع غيار خالص غير في الوكيل, أنا محتجتش أغير حاجه لسه بس اسمع أسعار عاليه. و أكتر حاجه مضايقاني ان الكراسي مش مريحه بالمره.
منصحش حد بيها على الرغم من إني مشفتش عيوب جوهريه فيها, بس ب 150,000 كنت أجيب هوندا سيفيك أحسن.ر.ح إسبيرانزا A516: عربيه مقرفه آخر حاجه, أولا مفيش إستابيليتي (ثبات) على الطريق, فرامل تعبانه و تكييف مقرف و الكاسيت باظ و عفشة ناشفه قوي و قطع غيار غاليه و مش موجوده و بتحمل كل حاجه في الصيانه. و مبخلصش من الناس علشان أقفل نور العربيه علشان ضارب في وشهم مع إني مش معلي النور بس العدسات بتخلي النور يضرب في مرايات الناس و يا امشي مش شايف قصادي يا أعمي الناس, فبعمي الناس أحسن...
منصحش حد بيها خالص و دي تاني عربيه ليا و كان معايا لانوس و ندمت إني بعتها و جبت صيني و دي حتكون آخر عربيه صيني أجيبها.ت.م إسبيرانزا A516: زي ما أنت شايف اهه العربيه متدغدغه و مش لاقيلها قطع غيار إستيراد و أكيد مش حجيب ربع غير إستيراد و العربيه لا ثبات و لا يحزنون و فرامل سيئه جدا و دي كانت سبب الحادثه, أنا مشفتش يوم عدل من ساعة مجبتها لإني في أول أسبوع خبطتها و بصراحه عربيه شؤم عليا و الحمد لله إني طلعت سليم لإن العربيه إتعجنت كأنها عقب سجاير لما إتفعص بوزه في الطفايه (تعليق غريب بس أنا مالي ) أنا إنبهرت بإمكانيات العربيه بالنسبه لسعرها بس أديني قاعد جنبها بلف على قطع غيارها و في الآخر العربيه حتتباع بالخساره و كفايه ان مفيهاش نسبة آمان.
أكيد منصحش حد بعقب السيجاره ده و الغالي تمنه فيه.
بصراحه سبته في حاله و مرضتش أخد و أدي معاه لإنه كان عصبي قوي و عمال يشتم فمحبتش أصور العربيه لحسن يشتمني أنا كمان...و من البوز المفعوص للهم الموكوس واحد عصبي, جيلي: لو بتفكر تجيب واحده متفكرش أحسن.
ليه كده؟ [size=16]ليه ايه يا عم؟ العربيه صلحتها أكتر من ما ركبتها و ملهاش قطع غيار و تحس ان العربيه قديمه و مبهدله و بويتها راحت و العربيه بقالها سنتين منهم سنه كنت مسافر يعني العربيه قعدت معايا سنه بس و بص على فوانيسها و إكصداماتها بص طالعه إزاي؟...
لا يا سيدي منصحش حد يشتري العربيه دي و أنا أصلا ببيعها و مش عارف...
[size=12]سؤال أخير معلش, كان معاك حاجه قبلها؟ [size=16]127 نصر و بعتها للآسف قلت الجديد مش حصلح فيه زي القديم و ندمان...[/size][/size][/size] إتجمعت الآراء كلها على ان العربيات الصيني في منها الحلو و الوحش, و طبعا دي مش كل الأراء إلي سمعتها من الناس بس أكيد مش حعرضها كلها بس بجيب الخلاصه.
معظم الشكاوي جت من
1- جيلي بكل فئاتها. 2- شيري كيو كيو. 3- إسبيرانزا A113 4- إسبيرانزا A516 (موديلات قبل أو بدايات 2008) 5- بريليانس إسبليندور (قطع غيار فقط)
معظم الناس فضلت انها تجيب عربيات تانيه بدل البريليانس الجالينا لإن في نفس سعرها يقدروا يجيبوا حاجات بمستوى أعلى و خامات أعلى و ماركه معروفه في حين ان البعض كان مرتاح جدا بإختياره ليها و شايف ان فيها رفاهيه مش موجوده بمثيلتها في نفس الفئه السعريه.
العربيه إلي معرفتش ألاقي حد أخد رأيه فيها هي البريليانس FRV الجديده لإنها مش منتشره قوي...رأي التجار في الكلام دهم.م "مندوب مبيعات": الناس اما بتجيلي بتكون محتاره دايما بين الفيرنا و الإسبيرانزا و زي ما أنت شايف مبيعات الصيني بقة كتير و الطلب عليها زاد ووعي الناس بالعربيه زاد و الناس تقبلت العربيه و سمعوا تجارب إلي قبليهم و على الأساس ده العربيه موجوده في مصر و منتشره و المبيعات خير دليل على كده.ط.س "صاحب معرض سيارات": في البدايه كنت متخوف أعرض عربيه صيني عندي بس الإنتشار الرهيب للعربيه و إستمرار طلب الناس للعربيه عندي و ده راجع لسعرها خلاني أعرضها عندي و العربيه مبتقعدش و بتتباع بسهوله بس مش كل الصيني برضه, يعني الناس بتيجي تسأل عن الإسبيرانزا دايما ال A516 و ال A113 و ده لإن شكلهم حلو و إمكانياتهم حلوة و سعرهم حلو إنما نادرا اما حد ييجي بيسألني عن جالينا بس في الأواخر لقيت ان الناس بتطلب ال FRV بس الطلب عليها أقل من الإسبيرانزا بكتير و ده عيب البريليانس عموما انه غالي.الختام حسن الكلام دي كانت أراء الناس نقلتهالكوا بكل أمانه و ده ميعتبرش مرجع لحد انه ياخده كأساس انه يجيب العربيه دي أو لاء, أنا شخصيا مبحبذش الفكره دي و أفضل إني أحط فلوسي في حاجه مضمونه أحسن.
و أتمنى ان الناس إلي معاها عربيه صيني تكتب خبرتها مع العربيه بكل أمانه و عدم تحيز لعربيتها علشان الناس تستفيد بخبرات إلي جرب.
و أحب أختم كلامي بالصلاه على سيدنا محمد (صلى الله عليه و سلم) و على آله و صحبه أجمعين. | |
|