اليكم الخبر التالي يا شباب علشان تخلوا بالكم من اللي جاي ربنا يستر علينا
وانا ماشي من يومين في شارع جوزيف تيتو فوجئت بوجود رادار من النوع المتحرك
(زي اللي موجود في دبي بالظبط) والامين باشا قاعد جنبه على كرسي في
الجنينه اللي في النص وقاعد يصطاد اللي ماشيين ولا حد حاسس بيه خالص
وطبعا كان ناصب الرادار ده علشان يرصد العربيات اللي رايحه في اتجاه
الكوبري
يعني اللي رايح من السندباد الى الكوبري اللي بينزلك على جسر السويس
وطبعا مش قادر اوصفلكم مدى صدمتي من اللي شفته ده لان الرادار الزفت ده كان
مجنني في دبي لاني كنت باتفاجئ بيه في اي خرابه من غير خوانه خالص تلاقي
نفسك كده متصور زي الباشا
لدرجة اني كنت ساعات باتصور وانا ماشي على سرعة 60 في شارع ماينفعش تمشي
فيه اقل من كده خالص
المهم ربنا يستر وماينتشرش الموضوع ده لانه بصراحه رادار غبي ومزعج جدا
لانه بيشتت الانتباه وبيخللي الواحد نظره دايما رايح ناحية الشمال وخصوصا
لو في جنينه في نص الطريق لان هي دي افضل الاماكن لوضع الرادار ده
وطبعا كان الموضوع ده مش بالخطورة في دبي اللي ممكن يكون عليها هنا في مصر
لان هناك كل واحد بيكون ملتزم بالحاره بتاعته ومش بيكون هناك اي مفاجاه من
مفاجاتنا هنا
يعني لو ركزت شوية هناك ناحية الشمال علشان اتابع الرادار مش حاتفاجئ بوجود
حد واقف قدامي مثلا او حد بيعدي الطريق فجاة مثلا او او او البلاوي كتير
طيب يا جماعه اللي عاوز اعرفه بقه
السرعه القصوى في الشارع ده كااااااااااااااااااااااااااااام؟؟؟؟؟؟؟؟؟؟
مش يحطوا يافطه الاول عليها اقصى سرعه وبعد كده يبقوا يحطولنا الرادار؟
ياريت حد يقوللي
ولو في حد شاف الرادار ده في حته تانيه في شوارع مصر ياريت تقولنا برده
علشان نبقى نخلي بالنا واحنا ماشيين
وربنا يستر علينا من الرادارات دي
الثلاثاء مارس 24, 2015 9:57 am من طرف sweet
موضوع: رادار جديد متحرك - بلوة جديده